Daar bestaan baie groot spanning tussen die eenvoudige en ooglopende logika van dinge in hierdie wêreld en die oënskynlik onlogiese, bonatuurlike wysheid van God.

Ek wonder of jy daardie spanning ervaar? Ek hoop beslis so, omdat die wêreld se logika besig is om die hele mensdom op daardie breë, maklike pad, wat na vernietiging lei, te sleep. Maar in teenstelling daarmee, roep Jesus mense om deur die nou poort te gaan en die moeilike pad, wat na die lewe lei, te volg.

Dis die rede waarom dit vir elkeen van sy dissipels spanning skep. Menslike logika sê vir ons dat die lewe maklik moet wees; dat ons suksesvol moet wees en dat ons moet kry wat ons wil hê. Maar God se wysheid bots loodreg met daardie selfgesentreerde logika.

Matteus 16:21-23 Van toe af het Jesus dit vir sy dissipels duidelik begin stel dat Hy Jerusalem toe moet gaan en baie moet ly onder die familiehoofde, die priesterhoofde en die skrifgeleerdes, en dat Hy doodgemaak moet word, en die derde dag uit die dood opgewek moet word. Petrus het Hom toe opsy geneem en Hom begin berispe: “Mag God dit verhoed, Here! Dit sal beslis nie met U gebeur nie.” Maar Jesus het na Petrus toe gedraai en vir hom gesê: “Moenie in my pad staan nie, Satan! Jy is vir My ‘n struikelblok, want jy dink nie aan wat God wil hê nie, maar aan wat die mense wil hê.”

Daar is dit. Petrus het hier dieselfde menslike logika, wat ek en jy instinktief sou gebruik, geopenbaar. Hy moes darem vir Jesus reghelp – om Hom te beskerm – nie waar nie! Maar dit het die hewigste reaksie ooit in die Skrif ontlok. Hoe sou jy gevoel het as Jesus dit vir jou gesê het?

Fokus jou gedagtes op die dinge van God, hoe vreesaanjaend dit soms ook al mag wees. 

Dis Sy Woord. Vars … vir jou … vandag.